Нүүр›Хөрөнгө оруулалт

Хөрөнгө оруулалт

Хархорум хот нь хөрөнгө оруулалтын баталгаатай эрх зүйн орчин, чөлөөт бүсийн онцгой нөхцөл, төр–хувийн хэвшлийн түншлэлийн өргөн боломжийг санал болгож байна.

Эрх зүйн боломж

Хөрөнгө оруулалтын эрх зүйн орчин

Хархорум хууль болон холбогдох хууль тогтоомжоор бүрдүүлсэн зургаан үндсэн боломж.

Чөлөөт бүс, тусгай бүс

Хархорум хуулийн 21 дүгээр зүйлийн дагуу хотод өндөр технологи, эрүүл мэнд, аялал жуулчлалын чөлөөт бүс, үйлдвэрлэл технологийн парк, гаалийн тусгай бүс байгуулж болно. Банк, санхүү, оффшор татварын хөнгөлөлттэй онцгой бүс байгуулах ажил 2026–2028 онд хэрэгжинэ.

Төр, хувийн хэвшлийн түншлэл

Хот нь 13 төрлийн чиг үүргийг гэрээний үндсэн дээр бусад этгээдээр гүйцэтгүүлж, зардлыг бүрэн буюу хэсэгчлэн санхүүжүүлэх боломжтой — авто зам, инженерийн шугам сүлжээ, музей театр номын сан, нийтийн тээвэр, хог хаягдлын менежмент, логистик, баяр наадам зохион байгуулалт зэрэг.

Хот хөгжүүлэх сан

Хотын төсвийн орлогын 10 хүртэлх хувь, хандив тусламж, ногдол ашгийн 10 хүртэлх хувиас бүрдэх сан. Нийгмийн дэд бүтэц, түүх соёлын өв хамгаалал, аялал жуулчлал, цэцэрлэгт хүрээлэн, ногоон байгууламжид зарцуулна.

Газар ашиглах эрх

Газар ашиглуулах үйл ажиллагааг дуудлага худалдаа, төсөл шалгаруулах зарчмаар шийдвэрлэнэ. Улс, хотын төсвийн хөрөнгө оруулалт, ТХХТ, олон улсын байгууллагын хөнгөлөлттэй зээлээр хэрэгжих төсөлд газар ашиглуулах онцгой зохицуулалт үйлчилнэ.

Үнэт цаас

Хот нь Хот, тосгоны эрх зүйн байдлын тухай хуулийн 16.1.8-д заасны дагуу Өрийн удирдлагын тухай хуульд нийцүүлэн үнэт цаас гаргаж болно.

Хөрөнгө оруулагчдын зөвлөл

Хөрөнгө оруулагчдын эрх, хууль ёсны ашиг сонирхлыг хамгаалах зорилгоор Хөрөнгө оруулагчдын зөвлөлийн бүрэлдэхүүн, ажиллах журмыг Зөвлөл батална (журмын 3.1.11).

Тэргүүлэх төслүүд

Хөрөнгө оруулалтын боломж

2026–2028 оны үйл ажиллагааны төлөвлөгөөнд тусгагдсан, хувийн хэвшлийн оролцоог хүлээж буй чиглэлүүд.

Төсөл	Чиглэл	Хугацаа	Оролцооны хэлбэр
Эдийн засгийн чөлөөт бүсийг цогцоор байгуулах	Санхүү, бизнес	2026–2028	ТХХТ / шууд хөрөнгө оруулалт
Олон улсын дата төв, өндөр технологийн үйлдвэрлэлийн төв	Технологи	ТЭЗҮ 2026 · барилга 2027	Шууд хөрөнгө оруулалт
Их хаадын цэцэрлэгт хүрээлэн (Скансен загвар)	Аялал жуулчлал	2026-оос	Хувийн хэвшил
Үйлдвэрлэл технологийн парк	Үйлдвэрлэл	2026–2028	Хувийн хэвшил
Мөнгөн мод цогцолбор	Соёл, бэлгэдэл	2026–2028	Улсын төсөв + түншлэл
Тээвэр логистикийн төв	Логистик	ТЭЗҮ 2027–2028	ТХХТ
Сэргээгдэх ба найдвартай эрчим хүчний цогцолбор	Эрчим хүч	Эхний ээлж	Шууд хөрөнгө оруулалт
Хөдөө аж ахуйн кластер, Агропарк	ХАА	2026–2028	Хувийн хэвшил

Хөрөнгө оруулалтын асуудлаар холбогдох

Хуулийн 26 дугаар зүйл

Тогтворжуулах гэрчилгээ

Хотод хэрэгжүүлэх төсөл Хөрөнгө оруулалтын тухай хуулийн 16.1.2, 16.1.3, 16.1.4-т заасан шалгуурыг хангасан тохиолдолд дараах хугацаагаар тогтворжуулах гэрчилгээ олгоно.

Хөрөнгө оруулалтын хэмжээ тэрбум төгрөгөөр	Гэрчилгээний хугацаа жилээр	Хөрөнгө оруулалт хийж дуусах жилээр
5–10 хүртэл	4	2
10–30 хүртэл	6	2
30–50 хүртэл	8	3
50–100 хүртэл	10	4
100–200 хүртэл	12	5
200–300 хүртэл	14	6
300-аас дээш	16	6

Хөрөнгө оруулалтын гэрээ

Бүтээн байгуулалтын төсөлд 100 тэрбум төгрөгөөс дээш хөрөнгө оруулах хөрөнгө оруулагчтай, түүний хүсэлтийн дагуу үйл ажиллагаа явуулах орчныг тогтвортой байлгах зорилгоор Засгийн газрын эрх олгосноор хотын Захирагч гэрээ байгуулж болно (26.2).

Тогтвортой байдлын баталгаа

Эрх бүхий байгууллага, албан тушаалтан өөрчлөгдөхөөс үл хамааран хөрөнгө оруулалтын тогтвортой байдлыг хангана (25.4). Татварын болон татварын бус дэмжлэгийг Хөрөнгө оруулалтын тухай хуулиар зохицуулна (25.5).

Гаалийн хөнгөлөлт

Гаалийн тариф, гаалийн татварын тухай хуульд 2025.01.23-нд оруулсан нэмэлтээр Хархорум хотын бүтээн байгуулалтад чиглэсэн импортын гаалийн татварыг 4 жил хойшлуулах зохицуулалт үйлчилнэ.